១.​ក្អករ៉ាំរ៉ៃ

ក្អក ជាប្រតិកម្មធម្មជាតិ ពេលរាងកាយបញ្ចេញចោលធូលីដី ឬផ្សែងបារីហុយចូលតាមការដកដង្ហើម ប៉ុន្តែក៏អាចបង្កឡើងដោយកត្តាជាច្រើន រួមមាន រលាកច្រមុះ ឬផ្ដាសាយ។ ក្អកយូរអង្វែង អាចជារោគសញ្ញាកើតហឺត ហើយឧស្សាហ៍ក្រោក ពេលយប់ ដោយសារពិបាកដកដង្ហើមភ្លាមៗពេលកំពុងគេង ក៏ជាសញ្ញាដែរ។

២.ដកដង្ហើមឮសំឡេង

ដកដង្ហើមឮសំឡេង ជារោគសញ្ញាកើតហឺតពិតប្រាកដ ព្រោះពេលប្រឹងដកដង្ហើម មានសំឡេងហួចបានបន្លឺឡើងព្រមគ្នា។ អាចនឹងងាយប្រទះបញ្ហានេះ ដូចជា ហាត់ប្រាណ ពេលអាកាសធាតុត្រជាក់។ គួរប្រយ័ត្ន ពេលហាត់ប្រាណ ក្នុងខែត្រជាក់។

៣.សម្អាតបំពង់ក

ខាកស្ដោះ មិនសមរម្យក៏ពិតមែន ប៉ុន្តែសម្រាប់អ្នកកើតហឺត ជាការសម្អាតបំពង់ក បញ្ចេញស្លេសជាប់ស្ទះនៅក្នុងបំពង់ក និងនៅក្នុងរន្ធច្រមុះ ព្រោះអាការៈសម្បូរស្លេសនៅក្នុងផ្លូវដង្ហើម អាចជារោគសញ្ញាហឺត។

៤.ហត់

ការកត់សំគាល់មួយទៀត ដែលអាចនឹងកើតហឺត បើមានអាការៈហត់ ក្រោយពេលហាត់ប្រាណស្រាលៗ ត្រូវអង្គុយចុះដើម្បីទប់ដង្ហើម មុននឹងបន្តទៀត។

៥.អស់កម្លាំង

ពេលខ្លះស្រាប់តែមានអាការៈដូចជាអស់កម្លាំង ថប់ដង្ហើម ណែនទ្រូង និងមានចង្វាក់ដង្ហើមខុសធម្មតា ដោយមិនដឹងមូលហេតុ។ នេះដោយសាររាងកាយយើង ស្រូបយកអុកស៊ីហ្សែនមិនគ្រប់។

៦.ងាយប្រតិកម្ម

រាងកាយឆាប់មានប្រតិកម្មពេលប៉ះពាល់លម្អងផ្កា រោមសត្វ និងអាកាសធាតុប្រែប្រួល ពិសេសប្រតិកម្មជាមួយអាហារសមុទ្រ អាហារកំប៉ុង និងគ្រាប់រុក្ខជាតិមួយចំនួន។

៧.រលាកទងសួតតាំងពីក្មេង

ឧស្សាហ៍រលាកទងសួតកាលពីក្មេង ធ្វើឲ្យបំពង់ទងសួតដឹកនាំអុកស៊ីហ្សែនទៅកាន់សួតអត់គ្រប់គ្រាន់ ជាហេតុបណ្ដាលឲ្យមានឱកាសកើតហឺត នៅពេលណាមួយ។

៨.និយាយមិនចេញញឹកញាប់

ករណីនិយាយមិនចេញញឹកញាប់ អាចមិនមែនជាសញ្ញាកើតហឺត តែបើរោគសញ្ញានេះកើតឡើងជាប្រចាំជាមួយរោគសញ្ញាដទៃទៀត វាអាចជាជំងឺហឺត។

 ប្រសិនបើប្រទះឃើញមានអាការៈរោគសញ្ញាដូចខាងលើ ត្រូវឆាប់ទៅពិនិត្យ និងប្រឹក្សាយោបល់ជាមួយគ្រូពេទ្យជាបន្ទាន់។